TRT Qarabağ hadisələri ilə bağlı film çəkmək istəyir 30 Aprel 2013 [18:45] Bakıda Azərbaycan Jurnalist Qadınlar Assosiasiyasının (AJQA) təşkilatçılığı ilə “Azərbaycan-Türkiyə əlaqələrinin inkişafında TRT-nin rolu” mövzusunda dəyirmi masa keçirilib. Gün.Az-ın məlumatına görə, tədbirdə Türkiyənin TRT kanalının baş direktoru İbrahim Şahin, onun köməkçisi Zeynel Koç, Anadolu Universitetinin rektoru Davud Aydın və Azərbaycanın aparıcı qəzet və informasiya agentliklərinin baş redaktorları iştirak ediblər. AJQA-nın prezidenti Sevil Yusifova iki qardaş ölkə arasında əlaqələrin daha da genişlənməsindən söhbət açıb və bunda TRT kanalının böyük rolunun olduğunu qeyd edib: “Son 20 il ərzində Azərbaycanla Türkiyə arasında əlaqələr sürətlə inkişaf edib və sözsüz ki, bunda TRT kanalının böyük rolu var. Kanalda Azərbaycanla, xüsusilə də Dağlıq Qarabağ münaqişəsi ilə bağlı yayımlanan verilişlər Azərbaycan həqiqətlərinin dünya ictimaiyyətinə çatdırılması baxımından böyük əhəmiyyət kəsb edir. Buna görə TRT rəhbərliyinə dərin təşəkkürümüzü bildiririk”. “Xalq Cəbhəsi” qəzetinin baş redaktoru Elçin Mirzəbəyli müstəqilliyin ilk illərindən TRT-nin Azərbaycanda baş verən hadisələrə geniş yer verdiyini bildirib. TRT-nin Azərbaycanda fəaliyyətinin genişlənməsi ilə bağlı istəyini dilə gətirən E.Mirzəbəyli ortaq proqramların hazırlanması ilə bağlı istəyini də diqqətə çatdırıb. “Palitra” qəzetinin baş redaktoru Namiq Əliyev uşaqlıq illərinin TRT-ni izləməklə keçdiyini deyərək bildirib ki, müstəqilliyin ilk illərindən başlayaraq Azərbaycanda TRT-nin böyük tamaşaçı kütləsi yaranıb: “Türkiyə kimi güclü və böyük bir dövlətin aparıcı kanalı kimi bu gün türk dövlətləri ilə əlaqələrin inkişafında TRT-nin üzərinə böyük yük düşür. İnanıram ki, TRT bu missiyasını bundan sonra da uğurla davam etdirəcək”. Türkiyənin TRT kanalının baş direktoru İbrahim Şahin ilk öncə rəhbəri olan kanal haqqında məlumat verərək bildirib ki, hazırda TRT-nin 15 kanalı və 18 radiosu fəaliyyət göstərir. Dünyanın ən böyük və nüfuzlu kanallarından sayılan TRT 34 dildə radio yayımı göstərir. TRT-nin Azərbaycanla əlaqələrə böyük önəm verdiyini deyən İ.Şahin yaxın gələcəkdə Azərbaycanla bağlı çoxlu layihələr reallaşdıracaqlarını diqqətə çatdırıb: “Biz öz təcrübəmizi azərbaycanlı həmkarlarımızla bölüşməyə həmişə hazırıq. Azərbaycanla bağlı bir çox layihələrimiz var. “Əli və Nino” romanı əsasında serial çəkilməsi ilə bağlı təşəbbüs göstərsək də, müxtəlif səbəblərdən bu təşəbbüsümüz baş tutmadı. Bununla belə inanıram ki, Azərbaycan, Gürcüstan və Türkiyənin birgə səyi nəticəsində yaxın zamanlarda sözügedən roman əsasında ya serial, ya da film çəkiləcək. Bundan başqa Qarabağ hadisələri ilə də bağlı da film çəkmək niyyətimiz var. Bunun üçünsə bir araya gəlməli və mükəmməl bir ssenari hazırlamalıyıq”. Azərbaycanda uşaq kanalının açılmasına böyük ehtiyac olduğunu deyən İ.Şahin bunun üçün hər bir dəstəyi göstərməyə hazır olduqlarını vurğulayıb. TRT rəhbəri ölkəmizdə gedən inkişafı da xüsusi qeyd edib. Görüşün sonunda İ.Şahinə AJQA-nın xüsusi mükafatı olan “Media ulduzu” mükafatı təqdim edilib. Babək Cahandarov Gün.Az